პროგრამის შესახებ

პროგრამა გათვალისწინებულია პრაქტიკოსი გამყოლებისთვის, რომელთაც გააჩნიათ ველოტურიზმში მუშაობის გამოცდილება. მსმენელები შეისწავლიან ველოტურიზმის საფუძვლებს (ველოსიპედის სახეობები და ტექნიკური მახასიათებლები, ველოსიპედის სვლის ნაირსახეობები, რისკები და საგზაო უსაფრთხოების წესები, ველოსიპედის ტექნიკური გაუმართაობის აღმოფხვრა და ა.შ.); სათავგადასავლო ტურიზმის საკვანძო კომპეტენციებს (ტურის დაგეგმვა, სტუმარზე ზრუნვა, ორიენტირება და ნავიგაცია, რისკების მართვა, ინციდენტებზე რეაგირება) და გამყოლობას ველოტურზე.

სწავლება მიმდინარეობს საველე სახელოსნოში, სასწავლო მოედანზე, საერთო სარგებლობის გზებზე და ველურ ბუნებაში, პრაქტიკული გაკვეთილების და დავალებების სახით, პედაგოგების დაკვირვებით და ხელმძღვანელობით. ზოგიერთი საკითხი ისწავლება ელექტრონული ფორმით.  პროგრამის ფარგლებში განხორციელდება ერთდღიანი და მრავალდღიან სასწავლო ველოტურები.

პროგრამის დამთავრების შემდეგ მსმენელი შეძლებს დაგეგმოს და გაუძღვეს ტურისტს/ტურისტების ჯგუფს სხვადასხვა სირთულის და ხანგრძლივობის ველოტურისტულ მარშრუტებზე, საერთო სარგებლობის გზებზე, სპეციალურად მონიშნულ ბილიკებზე და უგზოო მონაკვეთებზე,  სადაც შესაძლებელია ველოსიპედით გადაადგილება, ასევე მთაგორიან რელიეფზე, სადაც შესაძლებელია რელიეფის სირთულის გამო (დახრა, საფარი) საჭირო გახდეს ველოსიპედიდან ჩამოსვლა და ფეხით სიარული მოკლე დისტანციებზე. ველოტურის გამყოლის საქმიანობა იზღუდება მყინვარებზე.

პროგრამის თემატურ საკითხებს გაუძღვებიან შესაბამისი პროფილის პედაგოგები და ექსპერტები.